Ert þú í 5.–7. bekk?
Ert þú með hugmynd? Þá getur þú tekið þátt í NKG!
Það er einfalt að taka þátt í NKG
Þú þarft bara að vera með hugmynd…og þú mátt senda inn eins margar hugmyndir og þú vilt. Til dæmis hugmyndir sem leysa einhver vandamál eða aðrar sem gera lífið bara skemmtilegra og betra. Þú getur sent strax inn eða unnið hugmyndina betur þína á Heimasvæðinu – og sent síðar inn.
Þegar umsóknarfresti lýkur, í apríl á hverju ári, fer dómnefnd yfir hugmyndirnar og velur um 40 hugmyndir, sem komast í vinnustofuna sem er úrslitakeppni NKG.
Stórglæsileg verðlaun bíða sigurvegaranna og allar hugmyndir eru velkomnar ?
Hvað þarf að koma fram í umsókn?
- Hvaða vandamál vilt þú leysa?
- Hver er hugmyndin þín, hvernig virkar hún og
hvernig leysir hún vandamálið? - Hverjir geta nýtt sér hugmyndina? Fyrir hverja
er hún?
Hvernig fæ ég hugmyndir?
Í fyrstu getur litið út fyrir að vera erfitt að setjast niður og fá nýja, góða hugmynd til að senda inn í Nýsköpunarkeppnina. Það er samt alls ekki eins erfitt og margir halda og eru ýmsar leiðir til þess finna vandamál – og koma með lausn við þeim.
Flestar uppfinningar verða til af augljósri þörf: Ertu alltaf að gleyma lyklunum heima? Er allt of mikið rusl úti í náttúrunni? Vandamálin, bæði stór og smá, eru alls staðar í kringum okkur – og það getur verið þitt hlutverk að finna lausn á þeim, enda hafa margir krakkar fundið upp stórsnjalla hluti.
Hér fyrir neðan er ýmislegt efni sem getur hjálpað þér í hugmyndavinnunni. Hver verður hugmyndin þín?
Heimsmarkmiðin og nærsamfélagið
Til að fá góða og gagnlega hugmynd sem getur bætt samfélagið getur verið gott að skoða Heimsmarkmið Sameinuðu þjóðanna og sjá þar þau vandamál sem eru til staðar í kringum okkur. Ert þú með einhverja hugmynd sem gæti leyst eitthvert vandamálanna?
Margir hafa ekki efni á að æfa eitthvað eins og til dæmis íþróttir eða gera eitthvað skemmtilegt eins og að fara í bíó. Sumir eiga ekki mikið af fötum og leikföngum og geta ekki alltaf gefið afmælisgjafir eða farið í skólaferðir sem kosta peninga.
Margir hafa ekki efni á að kaupa skólamat, ávexti og grænmeti eða annan hollan mat, geta ekki alltaf komið með nesti í skólann eða til dæmis keypt flottan, góðan jólamat.
Margir hreyfa sig allt of lítið, borða ekki hollan mat, hanga of mikið inni eða hafa ekki efni á að fara til læknis eða tannlæknis. Enn eru margir einmana eða lagðir í einelti.
Mörgum gengur illa að læra, aðrir geta ekki fengið aðstoð við heimalærdóminn eða geta ekki lært það sem þeir eru „bestir í“. Sumum líður ekki vel í skólanum, til dæmis vegna eineltis, eða hafa engan til að leika við.
Ekki nærri allir átta sig á að það skiptir alls engu máli hvort þú sért stelpa, strákur eða annað kyn. Við erum öll jöfn og eigum sama rétt til alls.
Er ekki hægt að nýta meiri orku úr náttúrunni, til dæmis vind- og sólarorku, heita vatnið eða vatn úr ám og lækjum? Getum við notað minna bensín og olíu?
Mjög margir eru einir í bílunum sínum og því eru allt of margir bílar á götunum. Margir keyra of hratt eða fara yfir á rauðu ljósi og því getur verið mjög hættulegt að labba yfir götur. Geta fleiri ræktað grænmetið sitt einhvers staðar nálægt heimilinu?
Við hendum miklum mat og oft er mikið rusl á götunum og úti í náttúrunni. Við kaupum mjög mikið af alls konar hlutum sem við þurfum kannski ekki og hendum svo miklu í ruslið. Er hægt að gera það einfaldara að flokka rusl?
Nærsamfélagið og nýsköpun
Þú getur gert ýmislegt til að fá gagnlegar hugmyndir fyrir staðinn sem þú býrð á. Hér eru nokkrar leiðir.
Vantar eitthvað á staðinn þinn?
- Er verið að gera eitthvað á öðrum stöðum sem er ekki gert þar sem þú býrð? Væri hægt að gera það á þínum stað?
- Ert þú kannski með hugmynd sem enginn annar hefur fengið?
Hvað er sérstakt við staðinn þinn?
- Farðu út og skoðaðu þig um, talaðu við fjölskyldu þína, kennara og aðra sem þekkja staðinn vel.
- Er eitthvað í bænum eða náttúrunni í kring sem er alveg sérstakt og erfitt að fá annars staðar?
- Merkileg náttúra? Merkileg hús?
- Er eitthvað í bænum eða náttúrunni í kring sem er alveg sérstakt og erfitt að fá annars staðar?
Er hægt að gera eitthvað betur á staðnum þínum?
- Farðu út og skoðaðu þig um, talaðu við fólk, kennara og aðra sem þekkja staðinn vel.
- Er eitthvað búið til eða selt á staðnum þínum sem væri hægt að breyta?
- Gæti það til dæmis verið betra fyrir náttúruna?
- Er hægt að búa til eitthvað nýtt úr tveimur ólíkum hlutum?
- Er eitthvað búið til eða selt á staðnum þínum sem væri hægt að breyta?
Eru ónýttir fjársjóðir á staðnum þínum?
- Farðu út og skoðaðu þig um, talaðu við fjölskyldu þína, kennara og aðra sem þekkja staðinn vel.
- Er eitthvað tómt hús sem er hægt að nýta?
- Eru einhverjir afgangar eða „rusl“ sem er hægt að nota til að búa til eitthvað annað?
- Eru hlutir í náttúrunni sem er hægt að nota til að búa til hluti sem ferðamenn gætu haft áhuga á?
Tíu leiðir að góðum hugmyndum
Með því að skoða þig um kynnist þú umhverfinu þínu betur og kannski sérðu eitthvað sem hægt er að bæta.
Búðin
Farðu í búð og skoðaðu spennandi vörur. Veldu nokkrar sem þér líst á og kannaðu hvort þú getir gert þær betri með því að breyta þeim.
Strætó
Taktu strætó eða hjólaðu. Reyndu að sjá möguleika; færð þú einhverjar góðar hugmyndir?
Heima
Líttu í kringum þig heima hjá þér til að skoða hvað gerir heimilið einstakt. Er eitthvað þar að finna sem gæti búið til viðskiptahugmynd?
Íbúð
Ímyndaðu þér mjög venjulega íbúð. Hugsaðu þér að þú bíðir í tvær mínútur í hverju herbergi fyrir sig og reyndu að ímynda þér hvaða vandamál geta komið upp hjá fólki í þessum herbergjum. Dettur þér eitthvað í hug?
Lífið
Hugsaðu um einhvern sem þú þekkir persónulega. Ímyndaðu þér venjulegan dag í lífi þessa einstaklings. Skrifaðu niður öll vandamál og áskoranir sem manneskjan stendur frammi fyrir. Getur þú leyst einhver þeirra?
Göngutúr
Farðu í göngutúr um nágrennið. Hvað finnst þér vanta?
Vinna
Veldu starf sem þú þekkir vel og hugsaðu um hvaða vandamál gætu komið upp ef þú myndir vinna við það. Hvað er hægt að gera til að leysa þau?
Framtíðin
Spólaðu fram í tímann um fimmtíu ár. Eru einhvers konar vörur sem enginn þekkir núna en þú getur kannski fundið upp? Hvað verður þú að gera eftir 50 ár?
Fréttir
Lestu fréttir og finndu vandamál sem tengjast til dæmis læknisþjónustu, spítölum og skólum. Getur þú komið með hugmyndir sem gætu leyst eitthvert af þessum vandamálum?
Endurvinnsla
Átt þú eða einhver sem þú þekkir eitthvað sem þið notið ekki lengur en gæti komið þér að gagni? Getur þú breytt því þannig að það verði að viðskiptahugmynd?
Forritun
Ef hugmyndin þín er forrit eða vefsíða er gott að teikna hana fyrst upp til að sjá og sýna hvernig forritið eða síðan verður uppsett. Þú þarft ekki að forrita neitt á þessu stigi – bara teikna upp hugmyndina.
Þú getur notað teikniforritið á Heimasvæðinu eða prentað „forritunarblaðið“ út – eða fengið það hjá kennaranum þínum.
Dæmi um hönnun forrits
Velja: kaupa miða
Velja: leita að ferð
Ferðastyrkur NKG
Ferðastyrkur býðst þátttakendum af landsbyggðinni. Tilgangur hans er að koma til móts við aðgengi þátttakenda að viðburðum keppninnar sem fara fram í Reykjavík. Umsókn um ferðastyrk sendist til: nkg@nkg.is – merkt NKG ferðastyrkur. Styrkurinn miðast við ákveðna vegalengd frá búsetu þátttakenda til Reykjavíkur:
| Vegalengd til Reykjavíkur | Styrkupphæð |
|---|---|
| 100 km | 10.000 kr. |
| 200 km | 15.000 kr. |
| 300 km | 20.000 kr. |
| 400+ km | 30.000 kr. |
Forráðamenn geta haft samband og óskað eftir nánari upplýsingum fyrir brottför til Reykjavíkur. Athugið að styrkur getur verið hærri ef börnin fljúga fram og til baka!